Gjakovë, 21 Nëntor 2021 – Bashkimi Evropian ka mundësuar ndërtimin e ngrohtores së parë me biomasë në komunën e Gjakovës, duke investuar me mbi 15 milionë euro. Shefi i Zyrës së BE-së në Kosovë, Tomas Szunyog, ka thënë se impianti i ri do të ketë ndikim domethënës ekonomik dhe mjedisor në Gjakovë. “Ky investim 15 milionë euro për ndërtimin e ngrohtores së qytetit me teknologji të avancuar, është dëshmi e investimeve të BE-së në Kosovë. Efiçenca e energjisë elektrike në ndërtesat publike do të krijojë që të kemi një mjedis më të mirë dhe për një furnizim më të përballueshëm për të gjithë popullatën”, ka thënë ai.

Në anën tjetër, Ministrja e Ekonomisë, Artane Rizvanolli, ka thënë se rreth 40 për qind e energjisë së konsumuar nga ekonomitë familjare shkon për ngrohje.“Zgjidhja e çështjes së ngrohjes ndikon në cilësinë e jetesës dhe në shëndetin e qytetarëve”, tha ministrja Rizvanolli.

I pranishëm në këtë përurim ishte edhe kryetari i Gjakovës, Ardian Gjini, i cili potencoi se ngrohtorja me prodhimin edhe të energjisë, do të ketë impakt pozitiv për këtë komunë. “Këtë impiant që e kemi mbrapa dhe impiantin solar në Madanaj, sot Gjakova prin larg me energji të ripërtrishme dhe me energji fosile, së paku në Kosovë. Ngrohtorja e qytetit do të ketë shumë nevojë për ministrinë e Ekonomisë, sipas të gjitha gjasave edhe gjatë vitit 2022”.

Ndërsa, ushtruesja e detyrës së kryeshefes së e Ngrohtores së Qytetit të Gjakovës, Albana Skivjani, deklaroi se ngrohtorja ka funksionuar me humbje të mëdha, teksa shtoi se reduktimi ka qenë 12 orë. “Ky projekt është i vetmi i këtij lloji jo vetëm në Kosovë por edhe në rajon”, tha ajo, teksa shtoi se për vite kjo ngrohtore “ka funksionuar me afarizëm negativ, ku kanë operuar me 12 orë, ndërkaq, tani operojnë 24 orë”.

Si rezultat i këtij projekti, kostot vjetore të operimit për ngrohtorja pritet të ulen me 35 deri në 50 për qind, ndërsa në të njëjtën kohë ndotja e përgjithshme në këtë zonë do të ulet me mbi 90 për qind.